Oma, Opa, Starka i Starzik

Ja, co by my bez omy i opy zrobiyli? Jo pamiyntom, że jak zech boł mały, to mie opa Stanik takom karytkom wozioł. Abo siedzioł sie na mostku przi drodze, kurzoł fajfka, a jak formony z wonglym jechali od Miechowic, to zawsze sie z niymi pogodoł. Z omom Martom wychowali sztyrech chopców i dwie dziołchy, a sami dożyli diamyntowych godow.

Do opy Franza i omy Lyjny jeździyli my na Górniki. Opa mioł na ogrodzie cześnie, take fajne ciymne i słodke. Ino że podług niego one nigdy niy boły dojrzałe i zawsze nos gonioł, a my nie mogli tego spokopić, czymu. Oma umiała wyciongać kurom z gardła końskim wosym take czerwone chroboki. Czasym dowała nom złotek i godała: mosz tu złotek, schowej sie go do kabzy i niy godej opowi.

A wy coś pamiyntocie?