Z makym, syrym i z posypkom - kołocz weselny

Jak kołocz bydzie wyglondoł i jak bydzie smakowoł to zależy od kucharki. Jest jeszcze ich pora na tym świecie. Łone wiedzom co trza dać do kołocza i wiela trza dać. No, kołocz tyż idzie kupić we sklepie, ale te kupne som choćby naparfinowane i wele takego pieczonego stanonć sie ani niy mogom. A i dlo prawdziwy ślonski gospodyni kupowanie kołocza to jest gańba. Weselny kołocz to niy jest toni szpas, ale w końcu to jest wesele i tako jest u nos tradycja.

Nojważniyjsze w kołoczu jest to, że musi być wydarzony. Jak kołocz się niy wydarzy, to jest to nojgorsze co może być. Co trza zrobić. coby kołocz sie wydarzoł? Nojprzod trza porzykać, bo wszystko to, co do kołocza przidzie od Boga prziszło, a mode coby o Bogu niy zapomnieli, coby ta Bożo Rynka zawsze przi nich boła. Jak kucharka powiy, że do kołocza mo prziść to i to, tyla a tyla, to gospodyni niy może żałować i godać: "po co aż tyla". To zaroski lepi we sklepie kupić, bo szkoda ty cały roboty.

Czymu sie piecze weselny kołocz? Na rozdowka. Modzi chodzom (jeżdzom) z kołoczym i dowajom znajomym. Trza przi tym pamiyntać coby żodnego niy pominońć. Ale tyż jedne dostowajom wiynksze pakytki, a druge myńsze. I tak, coby srogi konsek na fara trefioł. Kołocz musi być rowno pokrojony, bez okrojków, fajnie zapakowany. Piyrwy we bioły papior, terozki tyż we fajny celofan dowajom. Prziozdobiony jest serwetkom, konskym merty i z małom karteczkom na kery som życzynia od mody pary.

Jak taki weselny kołocz wyglondo, to możecie sie łobejrzeć na łobrozkach. Chcielibyście skosztować? Ja, tu wom niy poradza. Ale możno mocie cera na wydaniu? To pamiyntejcie jak żeście som stond. Kołocz musi być. Bo tako jest nasza tożsamość.

Co widać na łobrozkach? Jak sie miele mak. To jest bardzo ciekawo maszynka. Jest oryginalno i bardzo, bardzo staro. Piyrwy boła na korbka, terozki na elektryka jest przerobiono. A wiela maku przez nia przeszło to żodyn niy wiy. Pora łobrozkow jest jak sie nojprzod w doma rychtuje posypka i mak. Potym jak się na blachach rychtuje. No i gotowy kołocz, a na końcu pokrajany i zapakowany. I tak jak godom: szkoda, że łobrozki niy pachnom.

Jakby ftory chcioł sam jeszcze coś dopisać, to byda sie bardzo radować.

{phocagalleryview=category|categoryid=215|limitstart=0|limitcount=4|imageshadow=shadow1|displayname=0|displaydetail=0|detail=2|displaydownload=0|displaybuttons=0|pluginlink=1|imageordering=9}